Ноќта меѓу 15 и 16 март 2023 година непознати лица упаднале во зградата на Културно-информативниот центар на Република Бугарија во Скопје и одзеле монитор од компјутер од просторијата која беше отворена на 25 ноември 2022 година.
Министерството за внатрешни работи го потврди инцидентот.
„Денеска (16.03.2023) во СВР Скопје е пријавено дека во текот на ноќта со употреба на сила било влезено во два угостителски објекта и во објект на Културно-информативен центар на Република Бугарија, на подрачјето на Центар во Скопје, при што од угостителските објекти биле одземени пари, а од Центарот е одземен еден монитор од компјутер. Увид извршила екипа од СВР Скопје и се преземаат мерки за расчистување на случајот“, соопшти МВР.
Бугарското министерство за надворешни работи смета дека кражбата на монитор од компјутер е напад на самата бугарска држава, а директорката на дирекцијата за Југоисточна Европа, Вања Андреева ја повикала македонската амбасадорка во Софија, Ангеса Руси-Поповска за да и изрази загриженост затоа што делото се одвивало во контекст на тековна антибугарска кампања.
„Без разлика на мотивацијата на сторителите, делото е напад врз самата бугарска држава. Потсетуваме дека со билатералниот договор за отворање на Културно-информативните центри од 2003 година, двете земји се обврзаа да гарантираат нормално функционирање на културно-информативните центри во двата главни града.
Директорката на дирекцијата „Југоисточна Европа“, г-ѓа Вања Андреева, на денешната средба во Министерството за надворешни работи, на амбасадорката на Република Северна Македонија, Агнеза Руси-Поповска и изрази сериозна загриженост поради тоа што ова кривично дело се одвива во контекст на тековната антибугарска кампања во Северна Македонија, вклучително и серија напади врз организации на локални Бугари, за кои сè уште нема ефективна правда и казна.
Таа го истакна очекувањето на бугарската држава институциите на Северна Македонија не само да ги идентификуваат сторителите на ова злосторство, туку и јасно да покажат дека ваквите напади врз претставништвата на Бугарија се апсолутно неприфатливи и ќе бидат кривично гонети со сета строгост на законот.
Од особена важност е да не се дозволи сторителите на ваквите дела да одржуваат чувство на неказнивост, за што се важни и ефективно спроведување на правдата и јавниот наратив создаден од политичарите“, соопшти бугарското министерство за надворешни работи.