Јануш Бугајски од Центар за стратегиски и меѓународни студии од Вашингтон во анализата која ја објави босанскиот весник „Дневни аваз“ тврди дека американската администрација е внимателна во поттикнувањето на Грција да го одблокира влезот на Македонија во НАТО и ЕУ преку отстапка во спорот со името.
По посетата на американскиот државен секретар Хилари Клинтон на Балканот, Бугајски пишал дека Македонија е на ничија земја меѓу Атина и Брисел и предупредува на црни сценарија за Балканот при недостаток на јасна евроатланска перспектива.
– Две земји што забележително изостанаа од планот за патување на Клинтон се Црна Гора и Македонија. Додека Црна Гора се гледа како релативно успешна приказна која не бара директно ургирање за да се квалификува во НАТО и ЕУ, Македонија е заглавена во ничија земја меѓу Атина и Брисел.
Американската администрација е внимателна во поттикнувањето Грција да го одблокира влезот на Македонија во НАТО и ЕУ, така што ќе направи отстапка во спорот околу името. Вашингтон е загрижен поради растот на ксенофобијата во Атина, додека земјата е на работ од економски крах и деструктивно социјално незадоволство.
Македонската влада, од своја страна, исто така си игра со национализмот, кој ги поткопува изгледите на земјата за европска интеграција – тврди аналитичарот Бугајски.
Без изгледи за придружување во ЕУ и НАТО и комплетирање на внатрешните реформи потребни за исполнување на реформите, вели Бугајски во анализтата, дел од регионот може повторно да потоне во сива зона на конфликт, дури и вооружени судири.