Претседателот на Главниот одбор на Алијанса за Позитивна Македонија, Владо Бучковски, потпретседателот Рубин Земон и носителот на изборната единица 5, Игор Камбовски вчера се сретнаа со граѓаните на Охрид.
-На Македонија и е доста од овој бипартизам. Време е државата да се обедини и да започнат да се почитуваат меѓусебно позицијата и опозицијата за доброто на граѓаните. Ние немаме програма од 2046 проекти. Нашата програма е убедливо најдобра, а таа има 3 чекори, да отвориме нови 100.000 работни места во реален сектор во период од четири години, да го развиеме земјоделството и да отвориме државна компанија за извоз. Овие мерки се проверени и функционираат насекаде околу нас, а ние заостануваме-изјави Бучковски.
Тој нагласи дека Коалицијата за Позитивна Македонија ќе биде вистинско изненадување на овие избори.
-Време е Македонија да ја водат прогресивни сили, кои ќе се борат за доброто на просечниот граѓанин, а не за индивидуални цели. На државата и е доста од нови почетоци, туку и треба континуитет-нагласи претседателот на Главниот одбор на АПМ.
Пред охриѓани се обрати и потпретседателот на Главниот одбор на АПМ, Рубин Земон, кој наведе дека нивната коалиција ја сочинуваат членови од 17 различни етнички заедници и дека само заедно и обединето може да се придонесе за просперитетна и позитивна Македонија.
Е. Г.
