Тимот на Обвинителството за гонење организиран криминал и корупција во соработка со полицијата во текот на вчерашниот ден до раните утрински часови работело на прибирање материјални докази поврзани со осомничените во случајот за примање награда за противзаконито влијание, а во кој осомничени се Бојан Јовановски и Зоран Милевски.
Обвинителството информира дека извршени се претреси во домот на родителите на првоосомничениот, во станот каде што престојувал, како и во просторијата што ја користел во едно правно лице, воедно извршен е претрес и во домот на второосомничениот, како и во возилата што ги управувале.
„При претресите прибран е броен доказен материјал што допрва треба да биде предаден на вештачење. Меѓу одземените предмети покрај два персонални компјутери и еден лап топ што ги користеле првоосомничениот и неговата асистентка, одземено е поголемо количество на брендирана гардероба, накит, часовници и уметнички дела. Од второосомничениот се одземени повеќе лап топ компјутери, документација, мобилни телефони, УСБ стикови и мемориски картички , како и поголемо количество на оружје и муниција за кое дополнително ќе се утврдува дали второосомничениот го поседувал со дозвола“, соопшти Обвинителството за вчерашната акција.
Oбвинителството ја извести јавноста дека до овој момент надлежниот обвинител не разговарал со други лица, за кои излегоа шпекулации во јавноста дека се повикани на информативен разговор во насока на расветлување на случајот.