Не собравме 80 гласа, Груевски ќе продолжи да биде пратеник и да зема плата од граѓаните додека е во затвор, напиша на Фејсбук пратеникот Павле Богоевски по гласањето за одземање на пратеничкиот мандат на експремиерот Никола Груевски.
На седницата ниту еден пратеник не се јави за збор, а „за“ предлогот гласаа 58 пратеници , и 29 „против“, што не беше доволно бидејќи, според Уставот, мандат се одзема со двотретинско мнозинство.
Претходно, Комисијата за деловнички и мандатно-имунитетни прашања донесе заклучок за одземање на пратеничкиот мандат на Грувски. Дел од пратениците, меѓу кои и Богоевски, кој претседава со Комисијата, тогаш побараа да се одземе мандатот на Груевски бидејќи, според нив, тој е недостоен за вршење на функцијата пратеник.
Ваква процедура следува по известувањето што стигна до Собранието од кривичниот суд дека пратеникот Никола Груевски е осуден со правосилна пресуда на 2 години затворска казна. Груевски не беше присутен во Собранието.
Галена Николовска-Ризвановиќ