СДСМ на прес-конференција покажа докази за притисок за опструирање на референдумот во Центар од страна на активисти на ВМРО-ДПМНЕ. На 26-ти април ќе се одржи првиот референдум во Центар, референдум за зачувување на духот и автентичноста на ГТЦ, и како што рече претседателот на ОО СДСМ Центар, Саша Богдановиќ, за негова обнова наместо уништување.
Ова е историски момент бидејќи граѓаните на Центар ќе одлучат каков ГТЦ сакаат.
„Никола Груевски и неколкумина соработници, уплашени од фактот, што нивните погрешни политики доживеаја дебакл во Центар, прават се, за да можат да ги попречат граѓаните, слободно да излезат и да го кажат својот став за ГТЦ.
Како и на изминатите изборни процеси, така и сега поддржувачи на Груевски ги применуваат познатите методи на притисок и закани врз граѓаните на Центар“, рече Богдановиќ.
Тоа посочи, го потврдиле членови на ВМРО-ДПМНЕ кои се охрабриле и доставиле списоци од вработени во Јавната администрација, врз кои се врши притисок да не излезат на референдумот. Ова, Богдановиќ рече дека и овој пат нема да успеат притисоците и заканите и граѓаните повторно, ќе му кажат не на Скопје 2014.
„Затоа на 26-ти април да излеземе за ГТЦ и да не дозволиме за него да одлучуваат пет луѓе, заради нивните хирови и фрустрации, а пред се заради нивните бизнис зделки“, вели Богдановиќ.
Одговарајќи на новинарско прашање за напад врз претседателот на УМС на ВМРО-ДПМНЕ и советник во Центар, Богдановиќ рече дека одговорно тврди дека СДСМ не стои зад тоа и дека методите на сила се познати како дел од функционирањето на ВМРО-ДПМНЕ.
„Сите граѓани утре во 14 часот можат да дојдат во населбата Капиштец, каде што ќе биде објавена нова бомба на СДСМ и од која ќе се чуе како ВМРО-ДПМНЕ владее и оди на избори со притисоци и закани“, рече Богдановиќ.