На вчерашната седница во Советот на Општина Охрид која беше посветена на советнички прашања советникот Дејан Блажески праша кој за време на кампањата од двата табора ја зборувал вистината и дали сегашното доцнење на проектите е резултат на проблеми со централната власт?
Поставувајќи го второто советничко прашање Блажески од ЛДП запараша до каде се проектите кои беа носечки на ДПМЕ во оваа локална кампања односно градскиот пазар и Автобуската станица, на што Бакрачески побара од одговорниот за тие проблеми да одговори на прашањето.
Во своето излагање одговорниот за тој ресор Рафтоски, истакна дека проектите се работат, но дека постојат проблеми со Катастарот и некои ресорни министрства во поглед на комплетирање на дозволите и документацијата и дека истото за брзо време ќе се надмине.
Блажески со дополнително прашање до Бакрачески кое гласеше: Дали овие проблеми за кои зборувате се оние проблеми со кои се соочуваше и поранешниот градоначалник и дали ова е признание дека Сојузот за Иднината ја зборувал вистината кога се зборуваше за кочење на проектите од страна на централната власт?
На ова градоначалникот одговори дека напротив не станува збор за кочење туку ова е доказ дека ништо и тогаш не било тенденциозно.
„Станува збор за проблеми со усогласување на новите авионски снимки од 2010 година кои ги вршеше Катастарот на Р. Македонија“, рече Градоначалникот Бакрачески.
Сепак се уште остана не јасно до крај кој е виновен за доцнењето на овие проекти.