Општина Битола во соработка со општинската организација на Сојузот на борци денеска со пригодна програма го одбележаа празникот 11-ти Октомври.
Делегација на општина Битола предводена од градоначалникот Владимир Талески, како и делегации на Сојузот на борци, политички партии и здруженија на граѓани, претпладнево положија букети цвеќе пред споменикот на Народноослободителната војна на Македонија што се наоѓа на плоштадот „Гоце Делчев“, како и пред спомен бистата на народниот херој Стив Наумов пред Домот на АРМ во овој град.
Според востановената традиција, општинската организација на Сојузот на борци по повод празникот 11-ти Октомври одржа историски час на партизанските гробишта во Битола, организираше литературен конкурс за учениците од основните и средните училишта на тема „Пламенот наш октомвриски вечно гори“, а делегации на таа организација остварија посета на болни и изнемоштени лица членови на Сојузот на борци.