Министерот за одбрана Фатмир Бесими на свеченоста по повод давање заклетва на питомците – студенти своето обраќање го говореше паралелно на македонски, но и на албански јазик.
Министерот ги игнорираше забелешките на Началникот на ГШ на АРМ, генерал – мајор Горанчо Котевски, кој во неколку наврати му потенцираше дека службениот јазик во АРМ е македонскиот.
Тоа не му попречи на министерот од редовите на ДУИ своето задоволство што се обраќа на како што рече „важен чин и чин на изразување на подготвеност за лична саможртва“ да го изрази и на албански јазик.
Дали со ова продолжува низата на несогласувања помеѓу началникот и министерот?
Котески поднесе иницијатива за дисциплинска постапка за четворицата униформирани припадници на АРМ кои го придружуваа министерот Бесими во полагањето венец на споменикот на ОНА во Слупчане. И неодамна го образложи својот став за „Белата книга“ на одбраната, како стратешки документ, која според него прво требаше да се објави на македонски јазик, а дури потоа да се преведува на албански и англиски јазик.
„Тоа е стратегиски документ, не е туристичка публикација“, изјави Котевски образложувајќи го тоа со фактот дека службениот јазик во АРМ е македонскиот.
Ниту Бесими, ниту Котевски по свечената заклетва на питомците и кандидатите со завршен прв циклус студии за офицери од родот авијација, не сакаа да дадат изјава и да одговараат на новинарски прашања.