Имајќи ги предвид резултатите постигнати во изминатиот период очекуваме напредокот соодветно да биде забележан во есенскиот Извештај на ЕК, истакна вицепремиерот задолжен за европски прашања Фатмир Бесими, кој денеска во Рим се сретна со италијанскиот министер за европски прашања Ензо Моаверо Миланеси и со заменик претседателот на Собранието Марина Серени.
Покрај тоа, нагласил Бесими, земјата ќе продолжи и со унапредување на односите со земјите од соседството и регионот при што фокусот останува на решавање на отворените билатерални прашања.
– Убеден сум дека Италија како искрен пријател на нашата земја ќе продолжи да ја поддржува европската интеграција на Македонија, рече Бесими.
На средбите, како што соопшти неговиот Кабинет, вицепремиерот се осврна на статусот на реализација на активностите поврзани со процесот на европска интеграција при што акцентот беше ставен на обврските кои произлегуваат од Пристапниот дијалог на високо ниво.
При тоа Бесими истакна дека во изминатиот период се покажани значајни резултати во различни области во активностите за реформи во поглед на остварувањата на обврските кои произлегуваат од Пристапниот дијалог на високо ниво.
Вицепремиерот Бесими информираше и за заклучоците и препораките од Извештајот кој го усвои ад хок Комисијата за настаните од 24 декември, како и за потпишаниот Меморандум за поддршка на членството на Република Македонија во Европската Унија, кој го потпишаа политичките партии, а кои како обврска произлегуваат од договорот од 1 Март.
На средбата стана збор и за меѓусебната соработка и областите во кои Македонија може да го искористи италијанското искуство во делот на европската интеграција.