Министерот за локална самоуправа Невзат Бејта денеска на прес-конфренеција објави дека поднесува оставка на функцијата. Причина за напуштањето на министерската позиција е неговото кандидирање за градоначалник на Гостивар на претстојните локални избори.
– Мнозинството граѓани на Гостивар бараа да бидам кандидат за градоначалник. Волјата на граѓаните на Гостивар ја прифати партијата и ДУИ ме номинираше за кандидат за градоначалник на општина Гостивар. За да не се злоупотреби функцијата министер за локална самоуправа денеска давам оставка, рече Бејта на прес-конференцијата.
Со ова, како што рече, ги почитува волјата на граѓаните и демократијата.
– Ќе бидам со моите граѓани и ќе работиме за локалните избори што ќе се одржат на 24 март, рече Бејта и додаде оти е благодарен на сите членови на Владата на Македонија за досегашната соработка, на сите институции, општини и граѓаните.
Одговарајќи на новинарско прашање, рече дека смета оти ќе победи на претстојните локални избори.
Бејта информира дека за нов министер за локална самоуправа е предложен заменик-министерот за транспорт и врски Тахир Хани.
Невзат Бејта стапи на функцијата министер за локална самоуправа на Република Македонија на 29 јули 2011 година.