Амбасадите на САД и ЕУ со заедничка изјава се огласија за политичката криза во земјава,а во која напоменуваат дека има извесен прогрес но потребно е уште многу работа за прочистување на избирачкиот список и фер медиумско покривање.
“Политичките лидери на оваа земја имаат одговорност пред своите граѓани да ја вратат земјата назад на евроатлантскиот пат преку спроведување на нивните политички договори и на итните реформски приоритети.
ЕУ и САД ги поддржуваат сите партии и другите учесници во процесот во нивната работа за создавање на услови за кредибилни избори. Ова подразбира прочистување на Избирачкиот список, спречување на било каква форма на заплашување или притисок врз гласачите, и обезбедување на фер медиумско покривање. Извесен прогрес е направен на овие полиња, но останува уште многу работа. Тоа е одговорност, не само на државните институции да подготват кредибилни избори, туку и на политичките партии. На 6 април се пропушти таква можност.
Заедно со другите меѓународни партнери, ЕУ и САД ќе продолжат да го поддржуваат демократскиот развој, што ги вклучува и изборите и ја поздравуваат работата на Државната изборна комисија, како и напорите на граѓанското општество во унапредување на оваа цел. Ние одблиску ќе ги следиме случувањата и ќе продолжиме да ги споделуваме своите гледишта“ пишува во заедничката изјава на амбасадорите Орав и Бејли.
