Голем дел од корисниците на ЕВН последниве неколку месеци се жалат на огромни разлики во сметките за струја во однос со потрошеното. Велат дека ако еден месец сметката им е огромна, веќе следниот ЕВН ја порамнува па добиваат сметка како да користеле само светилки. Дел од нив побарале објаснување од инкасаторите кои им кажале дека не можат да постигнат да ги читаат броилата секој месец, оти нема доволно инкасатори туку ги читаат секој втор месец па од тука разликата во сметките. Се пожалиле дека многу нивни колеги биле избркани од работа, а ЕВН не го надоместиле кусокот вработени.
Од ЕВН не кажуваат дали имаат недостиг од инкасатори или отчитувачи, како што ги нарекуваат вработените кои ги читаат броилата, но повикуваат сите корисници кои сметаат дека добиле нереална сметка за струја во однос на потрошеното да побараат корекција.
„Корисниците кои сметаат дека добиле фактури за електрична енергија со повисока сума од нивната потрошувачка, може да ја споредат потрошувачката во киловат часови наведена на фактурата со потрошувачката во киловат-часови на броилото. Доколку има разлика во киловат-часовите, корисниците може да се обратат до службите на Електродистрибуција со барање за корекција или да пријават состојба во центарот за односи со корисниците. Во секој случај, Електродистрибуција нема никогаш да наплати повеќе од она што корисникот го има потрошено. Ако корисникот нема отчитано броило и добие сметка со претпоставени вредности во кои има повеќе или помалку киловат-часови, тие во следната сметка ќе бидат впишани или одземeни“, велат од ЕВН за „А1он“.
Од компанијата тврдат дека и покрај тоа што во Законот за енергетика и во мрежните правила и правилата за снабдување со електрична енергија е пропишано отчитувањето на броилата да се извршува еднаш годишно, екипите на Електродистрибуција тоа го правеле секој месец.
Врз основа на податоците за потрошувачка кои се добиваат при отчитување на броилата, нагласуваат од ЕВН, секој месец се изготвува фактура за секој корисник поединечно. Отстапки од овој принцип на работа имале во случаи кога не постои можност за отчитување на броилото поради тоа што корисникот е отсутен, поради спречување на екипите од страна на корисникот, поради непристапност до мерното место поради тешките временски услови, отстапки се прават во регионите коишто се далечни и тешко пристапни во одредени периоди од годината, поради годишни одмори и слично.
Од ЕВН не одговорија на прашањето дали поради ненавременото читање на броилата корисниците можат да очекуваат измени и во правилата за исклучување на струјата со две неплатени сметки.