Асоцијацијата за детски дијабетес Баланс МК ја информира јавноста дека по објавувањето на информацијата за обезбедени донации од инсулините кои се дефицитарни во инсулинските аптеки во државава, и по позитивниот одговор од Министерството за здравство дека ќе ги процесуира донациите (во инсулин), согласно законските надлежности и обврски, сепак 10 дена од тогаш донациите, односно инсулините се уште не се пристигнати онаму каде што им е и местото – во инсулинските аптеки.
„Имено како што е информирана нашата асоцијација, донацијата вредна 700.000 евра (инсулини од типовите “ново рапид“ и “левемир“) од данската компанија “Новонордиск“ се уште чека на потпис во Министерството за здравство, иако од таму добивме уверување дека сите други формалности веќе биле завршени и останал само – нечиј потпис.
Со оглед дека тој “нечиј потпис“ по правило е обична мануелна работа (да се земе пенкалото во рака, малку да се подигне над лист хартија и да се испише скртатено име и презиме) која не трае подолго од, да речеме, десетина секунди, асоцијацијата “БалансМК“ апелира до ресорното министерство, доколку е можно во што пократок рок, да ја оконча оваа “операција на потпишување“ со што ќе направат благородно дело бидејќи потребните инсулини ќе стасаат до оние на кои им се наменети – лицата со дијабетес во Република Македонија“, велат од Асоцијацијата за детски дијабетес Баланс МК.