Алијансата за Албанците и Беса, по договорот за соработка во вториот круг од локалните избори, денеска имаа заедничка средба со граѓаните на Сарај.
Кандидатот на Беса за градоначалник на Сарај, Башким Бакиу и кандидатот на Алијанса, Екрем Алија, кој не велезе во вториот изборен круг, ги повикаа граѓаните да им дадат поддршка на гласањето на 29 октомври.
– На општината Сарај и треба градоначалник кој знае како да направи промена, кој носи надеж и ќе ги обедини граѓаните, рече Бакиу.
Истакна дека Сарај нема да биде на ниту една партија, ниту на БЕСА, ниту на Алијансата за Албанците, туку на сите граѓани.
– Општината треба да биде на сите граѓани, сите кои живеат тука треба да ги уживаат благодетите, а не некоја група или личност да ја користи општината за лични интереси. Ви ветувам дека општината ќе биде на сите граѓани кои живеат во Сарај. Нашите врати ќе бидат отворени за сите, и за оние кои имаат проблем и бараат решение и за оние кои сакаат да не пофалат за сработеното, истакна Бакиу.
Вети подобро образование во Сарај, борбата против непотизмот и политизацијата на училиштата, како и економски развој и странски инвестициие во општината.
Противкандидат на Башким Бакиу ва вториот изборен круг е Блерим Беџети од ДУИ.