На средба со граѓаните во Гевгелија, на која присуствуваа претседателот на Левица Димитар Апасиев и пратеникот Сашко Јанчев, беа претставени кандидатите на партијата за претстојните локални избори.
Кандидатот за градоначалник, професорот Тони Аврамов, ја претстави својата визија за Гевгелија како град на луѓе, а не на бетон.
„Сакам да ја видам Гевгелија таква каква што ја сакаат гевгеличани! Секоја инвестиција ќе биде јавно достапна и секој граѓанин ќе може да види каде оди неговиот данок. Да и кажеме стоп на урбаната мафија и да се фокусираме на реално остварливи проекти“, истакна Аврамов.
Тој најави повеќе приоритети – реставрација на старите градби и куќи, споменици на културата, уредување на централното градско подрачје со зелени површини, изградба на Јужен булевар со паркови и зелени зони, решавање на загаденоста и непријатните миризби, како и воспоставување на автобуски линии до населените места и заживување на месните заедници.
„Гевгелија има луѓе со душа, со знаење и со идеи. Само треба да им се даде простор, а не да им се одземе. Треба да им се слушне гласот, а не да им се купува тишината“, порача Аврамов.
Носителот на советничката листа на Левица, Никола Петров, потсети дека ова е трето учество на партијата на локалните избори во Гевгелија.
„На минатите избори во 2021 година за прв пат имавме советник, додека сега очекуваме советничка група. Но не застануваме тука – за прв пат настапуваме и со свој кандидат за градоначалник и уверени сме дека ќе влеземе во вториот круг, па дури и дека имаме реални шанси за победа“, нагласи Петров.
Тој додаде дека поддршката за Левица расте од ден на ден.
„Народот е веќе уморен од 34-годишното владеење на буржоаската класа и нивните политички претставници ДПМНЕ и СДС. Доста му е од тендер партии, корупција, криминал и непотизам. Дојдено е времето за политичка власт на работничката класа, за владеење на народот“, порача Петров.