Портпаролот на ВМРО-ДПМНЕ, Димче Арсовски не поднесувањето оставка на Мицкоски го правда со околностите во кои се наоѓа државата, а таквата постапка ја оценува како кукавички чин. Тој не ги искоментира барањата кои доаѓаат од актуелни и поранешни членови и функционери на ВМРО-ДПМНЕ. Арсовски смета дека оставката на Мицкоски е завршена тема за која нема што повеќе да се каже.
„Ова прашање е веќе одговорено од страна на партијата, претседателот Мицкоски и така натака. Би било кукавички чин, сега, во овие околности, оставка, кога Зоран Заев и СДСМ буквално ја тероризираат и крадат целата држава. Сметам дека ова е завршена тема на која не би имале што повеќе да додадеме. Подобро е да се фокусираме на криминалот кој што го прави СДСМ“, рече Арсовски.
Претходно, преку објави на социјалните мрежи, се повеќе членови на ВМРО-ДПМНЕ го искажуваат револтот кон лидерот на партијата, Христијан Мицкоски за изгубените избори и неуспехот да состави Влада, а притоа, бараат оставка од него и првите луѓе кои ги сметаат за виновни поради неуспехот. Ваквата реторика е засилена откако се официјализираше коалицискиот договор помеѓу ДУИ и СДСМ со кој тие добија ново владино мнозинство.
Меѓу нив се поранешната пратеничка и висок функционер во ВМРО-ДПМНЕ, Даниела Рангелова, поранешниот амбасадор на Македонија во САД и преговарач за спорот со името, Васко Наумовски, Петар Богојески кој беше заменик генерален секретар на партијата и дел од т.н. „реформатори“ на ВМРО-ДПМНЕ, поранешната пратеничка и член на ИК, а подоцна и исклучена од паријата, Нола Исмајлоска-Старова, поранешниот член на ИК, Александар Митов, ексдиректорот на УБК, Сашо Мијалков, ексминистерот за надворешни работи, Никола Поповски, ексминистерот за здравство, Никола Тодоров, кавадаречкиот градоначалник Митко Јанчев.