Се воведува ред во јавниот превоз во кој повеќе нема да можат да учествуваат возила кои немаат минимум Еуро 4 стандард. Ова е една од краткорочните мерки кои Град Скопје ќе ги спроведува по добиеното известување од страна на Министерството за животна средина и просторно планирање.
– Во континуитет се чистат дивите депонии, се зголемуваат субвенциите за алтернативен превоз, се воведува ред во јавниот превоз во кој повеќе нема да можат да партиципираат возила кои немаат минимум ЕУРО 4 стандарди со цел намалување нa загадувањето од овие возила. Зајакнат е инспекцискиот надзор на инсталациите под надлежност на Град Скопје и правни лица со Б интегрирани еколошки дозволи, се врши интезивна контрола на градилиштата, односно возилата што излегуваат од градилиштата заради контрола на прашина. Воедно го повикавме Министерството за внатрешни работи да спроведе засилени контроли на правните субјекти кои поседуваат одобренија за доставување на стоки издадени од страна на Градот Скопје – рече Данела Арсовска.
Град Скопје им препорачува на градоначалниците на општините во градот Скопје да ги интензивираат инспекциските надзори над субјектите кои управуваат со отпадни гуми и отпадни масла, а на Министерството за внатрешни работи да врши зачестени контроли на издувните гасови на возилата кои учествуваат во сообраќајот.
– За енергенс или при затоплување да не се користат отпадни материјали, прегорено машинсо масло, лакирани и обоени отпадоци од дрво, стиропор, ПЕТ амбалажа, гуми и каков било синтетички материјал. Да се користи суво и чисто дрво без примеси од земја и отпадоци, печките на дрво да се користат и одржуваат според упатствата на производителот, редовно да се чистат оџаците.Во изминатата година, градот Скопје има изречено казни од 12 до 88 илјади евра за правни лица и соодветни казни против физички лица кои се затекнати како неправилно одлагаат отпад и го прекршуваат законот – истакна градоначалничката.