Естрадни уметници од Македонија заедно со Воениот оркестар на АРМ утревечер од 19 часот ќе одржат концерт на плоштадот „Македонија“ во Скопје по повод прославата за одбележување на 18 Август – Денот на АРМ.
На концертот покрај Воениот оркестар ќе настапат и популарните пејачи Драган Мијалковски, Есма Реџепова Теодосиевска, Мустафа Имери и Блага Петреска.
Програмата ќе биде збогатена и со настапот на фолклорната група на Детскиот културен центар ,,Карпош“ од Скопје, а свој настап ќе имаат и припадниците на баталјонот за почести на АРМ, кои ќе ја изведат точката „ЕГЗИРЦИР“, со која ќе ги демонстрираат нивните вештини и строева извежбаност во работа со пушка. На крајот, програмата е предвидено да заврши со настап на DJ Никифор.
„Се покануваат граѓани и љубители на музиката од сите возрасти, утре на плоштадот Македонија во Скопје со почеток во 19 часот, да ни се придружат на прославата на 21-от роденден на АРМ и да се дружат со припадниците на АРМ“, се вели во поканата на АРМ.