Како дел од креативниот пристап чија цел е задржување на фокусот кон европската интеграција македонските власти го оценуваат предлогот на Европската комисија за старт на пристапните преговори и решавање на спорот со името во раната фаза од нив.
Вицепремиерот за европски прашања Теута Арифи порача дека треба да се искористи позитивната атмосфера и поддршката од Европската унија со цел да продолжи истиот интензитет на реформи.
„Ценам дека рамката која ја предложи комесарот Фуле во однос на преговорите за членство и преговорите за прашањето за името е во духот на креативниот пристап кој досега го практикуваше Европската комисија, а кој има за цел да придонесе за задржување на фокусот на европската интеграција. Сметам дека ова е еден многу важен момент и ние треба максимално да ја искористиме позитивната атмосфера и, пред сé, поддршката која доаѓа од нашите партнери од Европската унија и да продолжиме со истиот интензитет да работиме на реформите од европската агенда, но, исто така, да градиме добри, отворени, позитивни билатерални односи со сите соседи. Сметам дека исто толку е важно што Европската комисија преку овој предлог, во ваква рамка, сака да даде дополнителен импулс за нашата земја и верувам дека ќе го задржиме нашиот, како и секогаш, конструктивен пристап во однос на овие преговори, но, исто така, и во процесите кои овозможуваат полесна интеграција во Европската унија, која е стратешка цел на сите граѓани на Република Македонија”, рече Арифи.
Вели дека и покрај предлог-рамката на ЕК, разговорите за името остануваат под покровителство на Обединетите нации.
„Сметам дека Европската унија секогаш покажувала голема доза конструктивност и разбирање за процесот, еден процес на проширување за кое институциите на Европската унија се многу одговорни. Сакам да подвлечам дека оваа година Европската комисија и Европската унија во целост апсолутно покажаа голема ангажираност да се најде пат низ кој би чекореле сите земји од југоисточна Европа и се надевам дека тоа ќе има позитивен импакт во целиот процес, додека разговорите секако остануваат под авторитетот на Обединетите нации”, рече Арифи.
Оцени дека Годишниот извештај за напредокот на Македонија е позитивен, и е резултат на ангажираноста на државните институции, невладиниот сектор и ЕУ.
„Останува впечатокот дека станува збор за многу позитивен извештај во кој се нотирани значајни резултати и остварувања на обврските кои произлегуваат од процесот на европската интеграција. Исто така, сакам да потенцирам дека овој успех е резултат на максимална ангажираност на државните институции, невладиниот сектор и секако, нашите партнери од Европската унија”, рече Арифи.