Заменикот на претседателот на Владата на Република Македонија задолжен за европски прашања Теута Арифи денеска се сретна со јавниот заговарач на Регионалната комисија за утврдување на фактите за воените злосторства (РЕКОМ) во Македонија, професор Билјана Ванковска.
Како што соопшти Секретаријатот за европски прашања, за време на средбата Ванковска информираше за досегашниот тек на иницијативата и поддршката во рамки на Македонија, особено од државните институции, како и од шефот на Делегацијата на ЕУ, амбасадорот Аиво Орав.
– Вицепремиерот Арифи истакна дека регионалното помирување е важен аспект на процесот на европска интеграција на земјите од Балканот и редовно се следи од претставниците на Европската унија. Таа, исто така, посочи дека градењето на меѓуетничките односи во земјата е еден од главните приоритети и е дел од активностите опфатени со Пристапниот дијалог на високо ниво. Во тој контекст Арифи искажа поддршка за сите инцијативи кои придонесуваат за унапредување на регионалната соработка и градењето на доверба меѓу народите, се вели во соопштението од СЕП.