Заменик претседателот на Владата задолжен за европски прашања Теута Арифи денеска се сретна со пратеникот во Европскиот парламент и известувач за Република Македонија Ричард Ховит.
Како што соопшти владината прес-служба, на средбата стана збор за последниот Извештај за напредокот на Македонија при што соговорниците се согласија дека во него е нотиран значаен напредок во многу клучни области како резултат на посветеноста на земјата и институциите, како и на динамиката која произлезе од Пристапниот дијалог на високо ниво.
Во однос на препораките содржани во Извештајот, вицепремиерот Арифи информираше дека Владата подготвува нов Акциски план во кој се предвидени мерки и активности за адресирање на оние области во кои се потребни дополнителни реформи. Арифи исто така посочи дека за задржувањето на позитивниот моментум во рефомските процеси важно е нашата земја да добие поддршката и од Советот на ЕУ за време на декемврискиот самит.
Европратеникот Ховит го поздрави остварениот напредок во процесот на европска интеграција и изрази надеж дека Македонија и во наредниот период ќе продолжи со исто темпо да ги имплементира неопходните реформи.
