Седумте члена на Државната комисија за спречување корупција на јавната седница ги разгледаа приговорите поднесени до нив од страна на триесет и двајца државни службеници вработени во Генералниот секретаријат на Владата.
Првиот приговор го поднел административниот службеник од Кичево, Димче Стојановски, поради отпочнување на дисциплинската постапка за прекинување на работниот однос од страна на Генералниот секретаријат на Владата.
Екс раководителот на Центарот за вработување во Скопје, Слободанка Алексовска го поднела вториот приговор до антикорупционерите во кој се наведува дека в.д. директорката на Агенцијата за вработување спротивно на законот ја прераспределила Алексовска на пет работни позиции пониско, а отворила и дисциплинска постапка против неа и донела решение за суспензија.
На седницата беше решено Антикорупционерите да се обратат до институциите и да побараат одговор во рок од 15 дена за поднесените приговори до нив.
Претседателот на ДКСК, Игор Тантуровски, на прашање во врска со поднесениот приговор од поранешниот директор на Агенцијата за планирање на просторот, Љупчо Георгиевски, за прекршување на Изборниот законик, рече дека постапката е сè уште во тек.
Претседателот на ДКСК информираше дека сите следни седници на Комисијата на кои ќе се разгледуваат приговори за прекршување на Изборниот законик ќе бидат јавни. Тој не сакаше да открива детали од извештајот што антикорупционерите го испратија до Владата.