Јавниот обвинител не успеа да ги убеди антикорупционерите дека градоначалникот на Општина Сарај, Блерим Беџети, нема одговорност во случајот со дивоизградените платформи на Матка. Претседателката на Антикорупциската комисија, Билјана Ивановска, посочи дека одлучиле да достават претставка до Советот на јавни обвинители за да ја преиспита работата на јавниот обвинител, заедно со предметот и донесеното решение по истиот.
„Не се убедивме дека јавниот обвинител правилно и целосно ги презел сите процесни дејствија, ниту дека ги оценил сите податоци кои ги потврдуваат наводите дека градоначалникот со другите службени лица не ги преземале дејствијата и дозволиле стопанисување и остварување на противправна корист за себе и други, со непреземање на дејствија за отстранување на објектите“, рече Ивановска.
Таа додаде дека предметот на Матка е комплексен предмет, а вината не може да се насочи само кон градоначалникот на Сарај.
„Ја повикуваме Владата да постапи и да преземат конкретни активности за заштита на Матка и таа да биде прогласена за споменик на природата. Апелираме до Владата да го прифати барањето за постапување, како што претходно го прифати барањето за постапување за ефикасно справување со дивоградбите во крајбрежниот дел на Охрид и проблемот со закупот на плажите“, додаде Ивановска.