Заради суровиот третман на бездомните животни во општина Битола, здружението Анима Мунди поднесе пријава против општината за:
1.Нехуман третман, нехумано згрижување и сместување на бездомните кучиња во општина Битола т.е. нивно заловување и носење во зоолошка градина, чување во крајно сурови услови, мачење,усмртување;
2. Дејствување без Програма за што Општината Битола ја обврзува Законот за заштита и благосостојба на животните и
3.Дејствување вон одобрено Прифатилиште, т.е. во Зоолошка градина.
Поточно освен што условите и третманот на животните е суров, целото дејствување се спроведува без било каква дефинирана програма за хуман третман на бездомните кучиња и намалување на нивната бројка, т.е. произволно и спротивно на Законот за заштита и благосостојба на животните.
„Во процесов се ангажирани шинтери од ЈП Комуналец Битола (необучени), но не и ветеринари и се спроведува чистка на бездомните кучиња , а не стерилизација и враќање на кучињата на територијата на која се заловени, како што налага законот. Животните се изложени на стрес, трауми (се стационираат во услови каде се чуваат диви животни), крајна неудобност , глад, жед, болести и на крај смрт. Самото сместување на бездомни животни во зоолошки градини е недозволиво , а ако ги земеме и во предвид условите и целта на нивното заловување во случајов фрапантно и експлицитно се крши Законот за заштита и благосостојба на животните, како и Правилникот за техничките услови за прифатилишта – акти кои дефинираат норми, но и казнени постапки по кои бараме веднаш да постапат надлежните институции и најстрого ја казнат општината како прекршител на Закон.“, соопштуваат од Анима мунди.