Самобендисаноста, дрскоста и навредите од премиерот нема да ги направат резултатите на оваа Влада подобри од оние кои се забележани во годинешниот извештај на Европската унија за напредокот на Македонија. Извештајот ги бележи недостатоците во владеењето. Но, реформите треба да бидат за граѓаните. Не за самобендисаните елити во зградата на Илинденска, истакна на прес-конференција Стефан Андоновски од ВМРО-ДПМНЕ.
Очигледно е, додава тој, дека Владата не се грижи за реформите.
„И тоа е факт од кој не може да се избега со скапи настани и прес-конференции. Ковачевски изгледа ги преспал препораките на Европската комисија и од 2021 и од 2020 година“.
Андоновски оценува дека дедостасува реализација во клучните области. Ова, како што рече, се однесува особено на препораките за реформа на јавната администрација, градење на конкуренција на пазарот, слободно движење на стоки и работници, како и правото на интелектуална сопственост.
„Оценката на Европската комисија, во многу делови, е дека нема никаков напредок во спроведување токму на препораките од Комисијата во неколку претходни извештаи. Но, додека Владата зборува со навреди кон опозицијата, ние ќе зборуваме со факти. Во делот на реформата на јавната администрација ЕУ и забележува на Владата дека сите препораки од минатата година не се адресирани во доволна мера. Препораките за подобрување на процедури за елиминирање на непотизмот, клиентелизмот и кронизмот, вклучително и за назначување на менаџери и членови на надзорни и управни одбори не се имплементирани.Во иста ситуација е и борбата со корупцијата и организираниот криминал“, додава тој.
Според извештајот за активностите за 2020 година на ГРЕКО, кој е забележан и во овој извештај , Македонија, потенцира Андоновски, имплементирала само 52 отсто, а делумно имплементирала 40 отсто од препораките.
„Ако ги сумираме оценките, Владата во Македонија има и најнизок степен на напредок во вкупно 35 позиции. Во 35 области, Владата не успеала да постигне напредок поголем од оценка 2. Ова претставува непочит и за ЕУ и за ЕК, за кои Владата има само убави зборови, а нема дела.Но, најмногу е непочит кон македонскиот граѓанин кој очекува резултати. И за тоа не е виновна опозицијата. За ова се виновни неспособноста, неработата, надменоста и дрскоста на Владата“, нагласи Андоновски.