„Го закажавме пресот кај спомен куќата на Мајка Тереза за да им покажеме на луѓето каде можат да ни се придружат доколку сакаат да се вклучат и да помогнат околу протестите против поскапувањето на парното, струјата и бензините. Добродојдени се сите оние добронамерни, без разлика на етничката, верската или партиската припадност, кои сакаат да учествуваат во организација на протестите и имаат идеја како можат да помогнат. Оваа прилика ќе ја искористиме повторно да побараме од ССМ, КСС, УНАСМ да ги подржат овие протести за доброто на работниците. Доколку не ги подржуваат нека излезат јавно и нека ја кажат причината“, велат од „АМАН“.
Прашуваат, дали Живко Митревски, инаку претседател и на гранковиот синдикат на шумарите, смета дека овие поскапувања не ги допираат шумарите, дали претседателот на гранковиот синдикат на работниците од текстилната, кожарската и чевларската индустрија, Анѓелко Анѓелковски, смета дека текстилците, кои се едни од најниско платените работници, можат да преживеат со сите овие поскапувања, дали претседателот на гранковиот синдикат на рударството, Пеце Ристевски, смета дека рударите се способни да ги платат уште повисоките сметки за парно греење, дали претседателот на синдикатот на градежниците, Павел Трендафилов, смета дека градежниците, кои се едни од најсурово експлоатираните работници, имаат доволно високи плати за да ги издржат овие поскапувања,чии интереси штити Роберт Симоноски, претседател на синдикатот за енергетика и стопанство, интересите на ЕВН или на вработените во ЕВН и нивните семејства,дали претседателката на синдикатот на трговските работници, Мирјана Хаџи Скендева, смета дека трговците се задоволни од поскапувањата на горивата и електричната енергија?
АМАН бара сите гранкови синдикати да се изјаснат во врска со протестите против поскапувањата.
Повикаа утре на мирен протест во 18ч пред ‘‘Триумфалната порта‘‘, да дојдат сите на протест против скапата струја, парно тои бензините. Само со мирни но масовни протести можеме да ги натераме да ги намалат цените, велат од АМАН.