Чистката на Заев пред најавената реконструкција на Владата ќе зафати неколку министри и директори на битни позиции кои, според извори на „А1он“, не покажале добри резултати.
Партиски и извори од владата наведуваат за „А1он“ дека меѓу кандидатите на листата за заминување од Владата е Роберт Поповски, министер без ресор задолжен за комуникации, отчетност и транспарентност. Гафот кога премиерот се поздрави со Игор Спасов, убиецот на Мартин Нешковски, во Идризово, а фотографиите беа објавени на страницата на Владата му се става на товар на Поповски. Тоа уште не било заборавено како голем пропуст.
Подоцна следуваа уште неколку пропусти на службата под раководство на Роберт Поповски, како што беше циркусот околу поздравувањето на премиерот со американскиот претседател, Доналд Трамп, од три секунди кое беше соопштено како средба. Од секторот за односи со јавност признаа дека станува збор за несреќна формулација, која била споделена на ФБ-страницата на премиерот, Зоран Заев.
-Владиниот тим не се откажува. Тие за вечерва, доцна по македонско време, повторно најавија дека Трамп ќе го примел Заев. Станува збор за официјална вечера што е под покровителство на американскиот претседател, но не само за неколку луѓе туку за лидерите на сите држави членки на ОН. Според распоредот, Трамп има одвоено вкупно 45 минути за фотографирање и 15 минути за обраќање кон учесниците, наведуваа медиумите по гафот со таканаречената средба на Заев и Трамп.
На листата на кои оние за кои се планира заминување е и министерот за култура, Роберт Алаѓозовски, од кого се очекувало многу повеќе поради тоа што дојде од невладиниот сектор.
Иако доаѓа главно од издавачката дејност, никогаш досега немало повеќе жалби на конкурсот за издаваштво. Упатените знаат дека околу себе собра луѓе кои му се многугодишни соработници и од издаваштвото и од граѓанскиот сектор, а нивното ангажирање е исто така нетранспарентно, односно немаше ниту огласи ниту критериуми за избор. Иако пред своето назначување тврдеше дека транспарентноста ќе биде главен адут, овој министер за култура комуницира селективно во медиумите и строго протоколарно, врз слободна проценка на неговиот советник.
Обвинувањата за сомнеж за корупција при распределба на средствата и проектите од Годишната програма за култура доделени на негови пријатели, партиски другари и секакви врски. Сè уште е свеж и скандалот кога Македонската филхармонија доби преку 4 илјади евра од Министерството за култура за концерт на групата „Бернејс пропаганда“ од каде што кажаа дека не конкурирале и најавија тужба.
Алаѓозовски е и на листата министри кои најмногу потрошиле во угостителски објекти, заедно со неколку министри на ДУИ. Алаѓозовски се правдаше дека сметката била висока зашто сите невработени кога имале гости пиеле на негово име во бифето на Министерството.
Партиски извори наведуваат дека се размислува за разместување и на Мила Царовска, за која, сепак, се признава дека внела динамика во работата на Министерството. Не се прецизира кои се замерките за Царовска и дали се планира да премине во друг сектор.
Досегашниот министер за правда, Билен Саљији, сам се спасил со оставката со оглед дека знаел дека ќе биде опфатен со реконструкцијата на Владата поради слабите резултати. Саљији, за кого поголем дел од јавноста и не знаеше за што е министер, ја злоупотреби ситуацијата со малиот Алмир за да заработи политички поени.
Партиски извори коментираат дека можно е СДСМ да го земе Министерството за правда со оглед дека треба да се забрзаат реформите што се бараат од Македонија, а на ДУИ да ѝ се даде Министерството за образование. Сè уште има неколку опции за тоа кој би бил министер за правда доколку се направи размена на министерствата. Се спомнува дека во игра може да влезе и Фросина Ременски.
Се размислува да се разрешат и четворица директори на битни позиции поради незадоволителни резултати. Сите четворица беа именувани во август минатата година.
Меѓу нив е Драги Миновски, директорот на АД ЕЛЕМ кој дојде од професорското место на Електро-техничкиот факултетот во Штип. Иако прилично образован, според партиски извори, Миновски не ги исполнил очекувањата и не направил никакви придвижувања во ЕЛЕМ, а очекувањата на СДСМ биле големи со оглед дека партијата најмногу ветуваше на изборите за овој сектор.
-Сите тендери ќе бидат внимателно ревидирани од новото раководство, чиј врвен приоритет ќе биде зголемување на домашното производство, но и реализација на клучните енергетски капацитети, тврдеа од СДСМ во изминатите години и замеруваа што милиони евра се одлевале за сомнителни тендери наместо ЕЛЕМ сам да врши ископ на јаглен и јаловина.
Меѓу кандидатите за разрешување е и Ѓоко Танасоски, директорот на Царинската управа. Му се замерува дека и по повеќе од половина година не може да се справи со коруптивните структури кои сè уште роварат во царината и дека нема никакво придвижување напред.
Од позицијата можно е да биде тргнат и директорот на ЈП „Државни патишта“, Зоран Китанов, кој претходно директоруваше во јавното претпријатие „Струмица гас“. Иако близок човек на премиерот Зоран Заев кој ја истера гасификацијата на Струмица, најверојатно се спомнува дека ќе биде заменет. Како причина се наведува тоа што од него се очекувало да ги расчисти криминалите на претходното раководство, но немало никаков резултат.
На листата е и Зоран Ѓорѓиев, директорот на ЈП „Македонски шуми“, со чие доаѓање не се случиле никакви промени.
-Продолжија старите проблеми, превработеност, ненавремена достава на дрва, повторно се сечат на диво цели планини, наведуваат извори од владата за „А1он“.
Додека траеше конкурсот за избор на директори, иако конкурираше и сè уште чека резултат, Ден Дончев по вторпат беше именуван од Владата за в.д. директор на ФЗОМ. Партиски извори наведуваат дека се размислува функцијата да ја преземе друг зашто од Дончев очекувале многу поголеми вештини и менеџерски акробации. Се замерува што луѓето сè уште собираат донации на социјалните мрежи за лекување во странство и за одлуката за дотации на лабораториите.