Во текот на денот се гаснеле 13 пожари на отворено или шумски пожари. Пет се изгаснати, а активни се 8 пожари, информираше директорот на Центарот за управување со кризи (ЦУК), Стојанче Ангелов.
Најтежок е пожарот во атарот на селото Брезница, село Тажево во Македонски Брод, кој му се заканува на селото Брезница, но Ангелов е убеден дека селото ќе биде одбрането.
„Овде во текот на целиот ден дејствуваат неколку хеликоптери, ефектите од нив се мали но тука се наоѓа 40-член унгарски тим пожарникари кои даваат голем придонес со поддршка од 50 македонски професионални војници“, вели Ангелов.
Вториот тежок пожар е на територијата на Општина Демир Хисар, на Илинска планина, каде што ситуацијата е тешка, а во гаснењето активно учествува локалното население, локалните пожарникари, претставници од Национални шуми, но самата вегететација, како што велат од ЦУК, создава чад и го отежнува функционирањето на воздухопловите.
Освен овие пожари, огнени стихии има и во Охрид, над Косел, пожар кој повторно се распламнува. Пожар има и во Богданци, кај месноста Погана и таму се дејствувало со хеликоптери, но поради ветрот морале да се вратат. Пожар има и во Гевгелија, а огнот кој се приближува до воен објект, за кој, како што информираше Ангелов, го штити војската.