Локалната библиотека „Гоце Делчев“ од Велес стартуваше со акцијата „Подари книга, подари светлина“.
Тоа значи дел од сопствениот непотребен книжен фонд од домашните библиотеки граѓаните да го донираат до 3 октомври во градската библиотека, појасни за медиумите Игор Крајчев директор на библиотеката.
– Акцијата има за цел да ја подигне свеста кај граѓаните околу животниот век на книгите, односно старите и некорисни книги кои ги имаат во домовите да бидат повторно искористени од други корисници, изјави Крајчев.
Тој информира дека дел од книгите ќе подарат на Територијалната противпожарна единица од Велес, а кои пројавиле интерес да оформат интерна библиотека. Дел ќе добие Центарот за социјална работа, а кои понатаму ќе ги распоредат донираните книги.
Ова не е прва акција од ваков карактер на велешката библиотека. Во изминатите години во два наврати се спроведувани акции при што одѕивот од велешани, велат, е на солидно ниво. Имено, досега преку овој начин се донирани вкупно 1.400 книги за библиотеките во манастирот „Прохор Прињски“, училиштето во селото Иванковци и во СОС детското село,потенцира Крајчев.