Општина Аеродром во соработка со Друштвото за управување со отпад „Нула отпад“, денеска ќе реализира еко – акција за собирање електронски и електричен отпад во месната заедница „Долно Лисиче“.
Од општината ги повикуваат граѓаните пред оваа месна заедница од 12:00 до 14:00 часот да ги пријават или донесат старите електрични и електронски апарати од домаќинствата, од кои сакаат да се ослободат.
Под електронски отпад се подразбира статични и лаптоп компјутери, тастатури, глувчиња, кабли, звучници, слушалки, домашни телефони и мобилни телефони, МП3 плеери, монитори, телевизори, дигитални камери и видео-камери, принтери, скенери, факс-машини и стерео системи. Под електричен отпад, пак, се подразбира шпорети, машини за перење облека и садови, греалки и грејни тела, микробранова печка, машина за правење леб, апарат за кафе, други апарати од домаќинство, како и клима-уреди.
Порано овој месец акција за собирање електричен и електронски отпад се одржа во урбаната заедница „Горно Лисиче (југ)“.