Во Прилеп се прецизираат активностите за почетокот на расчистувањето на изгорените конаци во манастирот Трескавец. Во општина Прилеп денеска се одржа средба со фирмите и заинтересираните поединци кои сакаат да учествуваат во првата акција, што ќе се одржи в недела.
Според градоначалникот на Прилеп Марјан Ристески, сите добронамерници кои сакаат да помогнат во расчистувањето, за поголема успешност и организираност на акциите, своето учество да го пријават на телефонскиот број 076/425-102 или на електронската адреса [email protected]. Сите сопственици на теренски возила кои сакаат да се вклучат во акцијата, можат да се пријават на истиот телефонскиот број и на истата електронска адреса.
Ристески најави дека е подготвен план за расчистување на изгореното во манастирскиот комплекс. Овие акции ќе бидат континуирани, се додека постои реална потреба. Ќе бидат вклучени доброволци, претставници од локалната самоуправа, јавните претпријатија, бизнис секторот, невладиниот сектор и граѓаните.
Поаѓањето за неделната работна акција е во 7 часот, пред Центарот за култура „Марко Цепенков“, а организираните групи ќе ги придружуваат и планинарите од планинарското друштво „Картуш“.