По повод Меѓународниот ден за борба против насилството врз жените, 25 ноември, членки на кризниот центар „Надеж“ денеска на плоштадот „Македонија“ во Скопје организираа герила – акција на која околу два часа држеа транспаренти со испишани статистики и пораки за семејното насилство.
Кризниот центар „Надеж“ е организација која функционира 16 години и има отворено СОС – линија и нуди правни совети, психолошка помош и сместување во првите денови откако жените – жртви го напуштиле домот каде биле малтретирани.
Предвидено е следната година да бидат организирани 12 работилници во Скопје, Куманово, Струмица, Кичево и Струга на кои претставници од различни невладини организации и активисти ќе можат да се информираат и да стекнат соодветни вештини врзани со третманот на жртвите како и информации за самиот проблем – појаснуваат од „Надеж“. Посебен дел од работилниците ќе биде наменет за жртвите на семејно насилство на кои им треба психо-социјална рехабилитација, охрабрување и едукација.
Серијата на работилници кои ќе ги реализира кризниот центар „Надеж“ почнува во февруари во Скопје.
