На денешната средба со новинарите, лидерот на ДУИ Али Ахмети во претставништвото на партијата во Тетово, посочи дека токму сега е време Македонија да изнајде решение за надминување на спорот со името, бидејќи земјава има голема потреба од членство во НАТО и во Европската Унија.
„Нашиот коалициски партнер ВМРО – ДПМНЕ не се залага за јавна дебата по прашањето за спорот со името, а ние, напротив, се залагаме. Во спорот воопшто не се разговара за идентитетот и за јазикот, туку само за името.ВМРО – ДПМНЕ инсистира на уставното име, но очигледно тоа не поминува, затоа е потребен дијалог, преку кој би се дошло до компромис, што, пак, значи решавање на проблемот“, рече Ахмети.
Разговорот со новинарите првиот човек на ДУИ го заокружи порачувајќи дека Македонија во иднина ја гледа како земја на Охридскиот рамковен договор, како економски силна членка на НАТО и на ЕУ, со граѓани што имаат еднакви права.
Г.М.
