Претседателот на Демократската унија за интеграција Али Ахмети денеска оствари работна средба со Аник Ван Калстер, амбасадорката на Белгија во Република Македонија, со седиште во Софија.
Соговорниците, како што соопштија од ДУИ, разговарале околу актуелната ситуација во земјата и во регионот, економскиот развој, меѓуетничките односи, како и евроатланската интеграција.
Претседателот Ахмети говорел за потребата за конкретна меѓународна ангажираност во однос на решавање на спорот меѓу Скопје и Атина кој, како што истакнал, не држи далеку од интеграцијата во НАТО и почеток на преговорите за членство во ЕУ.
– Без вклучување на меѓународните пријатели, ова прашање не се решава. Без побрзо решавање на ова прашање, не може да има трајна стабилност и мир во земјата и во регионот, уште помалку здрави меѓуетнички односи и економски развој, рекол Ахмети на средбата.
Тој ја поздравил белгиската инвестиција во Македонија со надеж дека успешниот пример на белгиската фабрика за автобуси ќе го поттикне приливот на нови белгиски инвестиции во Македонија со што ќе помогне во економскиот развој и отворање нови работни места.
– Но, и одржливиот економски развој е заложник на нерешавањето на прашањето за името и одложувањето на членството во НАТО и ЕУ, поради политичката и финансиската несигурност која влијае и кај странските инвеститори, потенцирал лидерот на ДУИ на средбата.