Амбасадорите на Италија, Франција, Германија, САД, Велика Британија и на ЕУ денеска по средбата со лидерот на ДУИ Али Ахмети го оценија како конструктивно однесувањето на партијата за време на настаните од викендот и оценија дека како член на владината коалиција ДУИ ја дели одговорноста за унапредување на демократските вредности и принципи во земјата.
– Ја поздравуваме конструктивната улога на ДУИ за време на викендов вклучувајќи го и учеството на состанокот на Националниот совет за безбедност. Се надеваме дека ДУИ ќе продолжи со истиот конструктивен пристап да работи со сите страни и со сите институции. Како член на владината коалиција ДУИ ја дели одговорноста за унапредување на демократските вредности и принципи.
Затоа партијата има обврска да помогне во изградбата на институциите на државата и да осигура дека откриеното во објавените прислушувани разговори ќе биде целосно истражено на транспарентен и веродостоен начин. Се надеваме дека ДУИ ќе заземе став и ќе го искористи своето влијание за доброто и иднината на сите македонски граѓани, изјави италијанскиот амбасадор Ернесто Белели по разговорите со Ахмети во име на сите амбасадори.
Шестмината амбасадори денеска попладне ќе имаат средба и со лидерот на опозициската СДСМ, Зоран Заев.
Амбасадорската шесторка вчера одржа средби со претседателот на државата Ѓорге Иванов и со премиерот Никола Груевски.