Лидерот на Демократската унија за интеграција, Али Ахмети, најави дека следниот протест во поддршка на поранешните водачи на ОВК, на кои им се суди во Хаг, ќе се одржи во Скопје на 13 декември.
Протестот ќе започне во 13 часот на плоштадот „Скендербег“. Ахмети изјави дека целта е да се побара правда и да се испрати поддршка за, како што рече, „ослободителите кои неправедно се држат во затворите во Хаг“.
Тој ги повика Албанците да се приклучат на протестот, со цел да ја демонстрираат „чистата борба за слобода и независност“.
Ахмети претходно учествуваше на протестите во Приштина и Тирана, организирани во знак на поддршка на обвинетите поранешни лидери на ОВК.
Во Специјализираните совети во Хаг се суди на Хашим Тачи, Кадри Весељи, Јакуп Красниќи и Реџеп Селими за наводни воени злосторства извршени на Косово.