Претседателот на Демократската унија за интеграција, Али Ахмети оствари средба со холандскиот амбасадор Воутер Пломп, со кого разменија мислења за ситуацијата создадена по изборите на 11-ти декември и за иднината на земјата, соопшија од ДУИ.
Ахмети истакнал дека ДУИ внимателно ја следи состојбата и е свесна за тешките одлуки кои треба да се преземат во блиска иднина, земајќи ги предвид создадените околности, додаваат од партијата.
Ахмети нагласил дека јазичната еднаквост, системските реформи, економската еднаквост и интеграцијата остануваат приоритети, но и транспарентноста на судските постапки кои резултираа со дилеми во јавноста, велат од ДУИ.
ДУИ е посветена на остварувањето на својата политичка програма во согласност со очекувањата на граѓаните во овие тешки и предизвикувачки времиња. Ахмети зборуваше и за потребата за подготвување и одобрување на заедничка политичка платформа на албанските парламентарни партии и ДУИ останува посветена и целосно отворена за да се постигне успех во оваа исклучително важна иницијатива, порачуваат од ДУИ.
