Притворот за пратеникот Крсто Мукоски е определен по сите основи, но ниту еден од нив не е аргументиран, изјави неговиот адвокат Игор Кичеец.
– Притворот е определен по сите три основи предвидени во Законот за кривична постапка. Ниту еден од тие основи не држи, бидејќи Обвинителството имаше седум месеци да ја заврши истрагата. Mојот клиент три пати доброволно доаѓаше и се јавуваше уредно во Судот. Има службен пасош, а има и лична патна исправа. Доблесно ќе беше од страна на обвинителството и судот барем основот „бегство“ да отпаднеше, изјави Кичеец денеска пред Кривичниот суд.
Тој смета дека непоимливи се аргументите на обвинителството со кои го бранеше притвори, дека тој ќе влијаел на сведоци или поради можност од повторување на делото.
Адвокатите имаат рок од 24 часа за да се жалат на одлуката на Судот.