Адвокати од повеќе градови во државата бараат од Адвокатската комора на Македонија да преземе мерки за времено стопирање на Законот за адвокатски маркички и да донесе препорака за преземање само на неопходните, итни предмети се до одлуката на Уставниот суд за оценување на уставноста на овој закон.
Иницијативата тие денеска ја доставија до Управниот одбор на Адвокатската комора на Македонија.
Според адвокатите, овој закон е противуставен и недоречен и создава хаос во работењето на адвокатите. Со законот, велат тие, се доведува во прашање работата и функционирањето на адвокатурата како самостојна и независна дејност предвидена со Уставот на Република Македонија.
– Целта на изразување на ваков јавен протест кон Адвокатската комора е тоа што овој закон не смееше да се дозволи да биде донесен бидејќи со него директно се врши упад во самостојноста и независноста на адвокатурата која претставува уставна категорија. Под превезот дека со овој закон се сака да се донесе ред во финансиското работење на адвокатите, автоматски тие се обврзани со овој закон да го изложуваат јавно пред органите предметот на своето работење, односно кој им е странка и зошто работат. Тоа е дозволиво и е спротивно на Законот за адвокатура, изјави адвокатот Димитар Панчевски од Иницијативниот одбор.
Револтирани се од работењето на Управниот одбор на Адвокатската комора и најавуваат дека ќе бараат негова оставка или ќе организираат вонредно собрание.
– Она од што најмногу сме огорчени е тоа што овој закон за адвокатски маркички којшто не смееше да се дозволи да се донесе е предложен од страна на Адвокатската комора поточно од Управниот одбор на Комората, истакна адвокатката Анита Бегова.