ДУИ на овие избори има конкретна и амбициозна понуда со специфики за секоја конкретна општина, кои ќе бидат елаборирани од нашите кандидати во директна комуникација со граѓаните, рече денеска на прес-конференција Арбер Адеми, портпарол на Централниот изборен штаб на ДУИ.
Според Адеми, граѓанинот е во центарот на вниманието и интересот на ДУИ која за нив нуди решенија за побрзи и поефикасни услуги, за модерна инфраструктура и за воведување позитивни промени во квалитетот на животот.
Кампањата на ДУИ, посочи Адеми, ќе биде модерна и интерактивна со директни средби со граѓаните, од куќа до куќа, од семејство до семејство, низ работилници и бизниси, низ улици и плоштади, кои постојано се менуваат кон подобро.
– Огромен интерес на ДУИ и нашите кандидати, е оваа кампања и овие избори, да поминат во мирна, фер, демократска атмосфера, така што нашите граѓани ќе имаат можност да ги изберат на најслободен можен начин градоначалниците и советниците кои ги сакаат, рече Адеми.
Тој најави дека утре изборниот караван предводен од претседателот на ДУИ Али Ахмети, ќе ги посети општините Пласница и Долнени.