Цели 42 години ќе треба да работи Комисијата за труд и социјална политика, доколку ДУИ продолжи со денешното темпо и ветување, дека ќе разгледуваат по еден амандман дневно за Законот за бранители.
Ова ќе значи дека ќе треба да работат без саботи и недели, без празници, без славење на Нова година, Бајрам и Велигден.
Значи некои од парламентарците на 80-тина или 90-тина години, со бастум ќе доаѓаат до законодавниот дом и ќе дебатираат за правата на бранителите, дали законот е антиалбански, и дали треба и припадниците на ОНА да ги добијат истите права како и бранителите. И се разбира ќе треба да го смениме изборниот систем, и сегашниот состав ќе треба да го инаугурираме и да им дадеме доживотен пратенички мандат.
А доколку се „смилуваат“ па се поминуваат по „цели“ два амандмани ќе треба „само“ 21 година.
Никој не го оспорува правото на дебата, но доколку има разрешница. Надмудрувањата во Комисијата допрва престојат. Седницата продолжува во вторник во 11 часот.