Вкупно 137 лица позитивни на коронавирус се пријавиле за гласање на предвремените парламентарни избори, а Државната изборна комисија добила пријави за гласање и од 3138 болни и немоќни лица. Оваа бројна состојба е заклучно со вчерашниот ден, а пријавувањето е отворено до вечерва на полноќ.
Тие ќе можат да гласаат дома, а за нив ќе бидат формирани посебни тимови во кои ќе има и здравствени работници.
Од Државната изборна комисија известија дека од вкупно 300 здравствени работници кои треба да бидат вклучени во изборниот процес, добиле 100 барања за изземање од различни причини. Барањата се прифатени на 80 здравствени работници.
„Имаме мал проблем околу изборот на здравствените работници. Од веќе избраните, 80 донесоа медицинска или друга документација со која потврдуваат дека не можат да учествуваат во изборниот процес. Сега пак ќе ги менуваме, ќе избереме нови по случаен избор“, велат од ДИК.
Изземените здравствени работници донеле документација за хронични болести, дел биле пензионери, а меѓу избраните имало и такви кои не можат да се најдат на пријавените адреси. ДИК работи на собирање податоци за пополнување на тимовите.
Министерот за здравство Венко Филипче рече дека доставиле до ДИК списоци на здравствени работници по општини, а дека изборот ќе го направи Комисијата.
„Има мал број здравствени работници кои се пријавиле дека имаат хронични болести, тие може да се повлечат. Предвидено е по тројца здравствени работници да има во секоја општина, сметам дека може да се направи селекција“, рече министерот Филипче.