Тринаесет политички партии денеска ја поддржаа Декларацијата за обезбедување на финансирањето на програмите за заштита, превенција и поддршка на ХИВ, предложени од граѓански организации. Претходно тие учествуваа на тркалезната маса на тема „Обезбедување на одржливост на програмите за превенција, грижа и поддршка за ХИВ“.
Драгана Кипријановска од Демократски сојуз рече дека со актот на потпишување на Декларацијата укажале на нивната поддршка да продолжат со активна соработка со граѓанскиот сектор, и прикажале пред јавноста дека имаат доволно слух да ги препознаат и да одговорат на реалните потреби на граѓаните.
Маја Морачанин од Демократската обнова на Македонија истакна дека при донесувањето на новиот буџет се заложиле дека средствата за овие ранливи категории луѓе мора да се обезбедат, бидејќи, како што рече, во спротивно би дошле во опасност од развој на епидемија на СИДА.
– За нас како политичка партија многу важна платформа е обезбедувањето на социјална правда, еднакви можности за сите и недискриминација. Во рамки и на овие наши заложби се грижиме секогаш за ранливите категории по различни основи. Во овој случај станува збор за луѓе кои се ранлива категорија во висок ризик од ХИВ/СИДА, додаде Морачанин.
Елизабета Божиноска од Асоцијацијата за здравствена едукација и истражување – ХЕРА и претставник на платформата за одржливост на ХИВ програмите, рече дека преку настанот имале можност да отворат дијалог меѓу политичките партии и граѓанскиот сектор.
Посочи дека идната година заминува Глобалниот фонд за борба против ХИВ/СИДА, туберкулоза и маларија и е потребно како држава да преземеме мерки сите воспоставени програми изминатите 12 години со кои се држи под контрола инфекцијата, да бидат одржливи.
– Политичките партии се обврзаа преку своите претставници во Парламентот по изборите, и преку претставниците на извршната власт доколку имаат можност да бидат дел од неа, да иницираат и да подддржат обезбедување финансиски средства за сите програми за превенција за ХИВ по повлекувањето на меѓународната подршка, но и да се заложат, иницираат и да поддржат подзаконски или законски механизми со кои ефективно ќе можат да се одржат овие програми во иднина, со кои ќе се овозможи нивна финансиска поддршка од страна на домашниот буџет по повлекувањето на меѓународната поддршка, нагласи Божиноска.
Одговарајќи на новинарско прашање рече дека за идната година во буџетот на Програмата за заштита на населението од ХИВ/СИДА во Македонија се предвидени 27 милиони денари.
– Проценките кои ги направија експертите кои ги ангажираше Министерството за здравство предвидоа дека се потребни најмалку 65 милиони денари за да се одржи третманот, за да се обезбеди третман за целата година и за шест месеци да се обезбеди одржливост на програмите за превенција, додаде Божиноска.
Декларација ја поддржаа Демократска обнова на Македонија, Демократски сојуз, Движење за реформи ДПА, Достоинство, Левица, Либерална партија, Либерално-демократска партија, Нова социјалдемократска партија, Партија за европска иднина, Партијата за целосна еманципација на Ромите, Социјалдемократски сојуз на Македонија, Унитети, Фродем.