Во организација на Федерацијата на фармерите на РМ ќе биде одбележано затворањето на проектот „Промоција на интересите на фармерите во РМ“ и десетгодишната соработка со Меѓународната шведска агенција за развој (Сида).
На свеченоста ќе се обрати Претседателот на ФФРМ, Андрија Секуловски и претставникот на Сида, Андерс Хедлунд.
Станува збор за значаен проект, не само за ФФРМ, туку и за Македонија кој даде придонес во развој и јакнење на земјоделското здружување, да се чуе гласот на земјоделцот и заштита на неговите права и интереси.
Во рамки на проектот посебно внимание се посвети на младите и жените фармери со цел и тие да бидат вклучени активно во донесувањето значајни одлуки за развој на земјоделството.
Федерацијата на фармерите на РМ во последните три години самостојно го реализираше проектот поддржан од СИДА под наслов „Промоција на интересите на фармерите на РМ“. Преку него се финансираа активности за надградување и одржливост на организацијата.
Четирите главни цели на проектот се: стратегија за одржливост на ФФРМ, подобрување на организациските капацитети, структура и организациски рутини, пристап до фондови од различни донатори и промовирање и заштита на интересите на фармерите.
Реализацијата на проектот беше технички поддржана од меѓународната консултантска куќа ГРМ.