Вработените во Фабриката за шински возила Колска од Велес денеска го стопираа едномесечниот штрајк и не ги блокираа возовите на Железничка станица како вчераутро.
Според претседателот на синдикатот на Kолска Слободан Димитриевски, одлуката за прекин на штрајкот е поради тоа што вчера добиле една плата, а со посредство на Владата им било ветено дека ќе ги добијат и останатите пет плати за годинава, како и здравствено осигурување.
Преговарале, рече Димитриевски, и со раководниот тим на ЈП МЖ кој треба да им го исплати преостанатиот долг од 6,7 милиони денари за поправката на товарните и патничките вагони.
Тој информира и дека од денеска сите 131 вработен се на двонеделен колективен одмор. Очекуваат да им се реши статусот на фирмата, како што вети Владата.
Колска во најголем дел е во државна сопственост. Вработените со оглед на работата што ја извршуваат – поправка на теретни и патнички вагони, години наназад бараат надлежните да ги припојат кон ЈП Македонски Железници.