Кинескиот производител на возила „Џили“, кој е сопственик на шведската фабрика за автомобили „Волво“, ќе етаблира нов центар за развој и истражување во Гетеборг, јавува дописникот на МИА.
Новиот развоен центар ќе вработи 200 инженери од Кина и Шведска, кои ќе работат на развој на нова платформа за производство на помали автомобили во „Волво“ и „Џили“. Со оваа инвестиција „Волво“ уште поцврсто се врзува за кинескиот „Џили“.
Со оглед на тоа дека станува збор за развој на заедничка платформа, двете компании ќе се фузираат преку низа други функции, како што се заеднички набавки и заеднички истражувања.
Новиот развоен центар ќе биде пласиран во образовниот центар „Линдхолмен“ во Гетеборг и ќе биде целосно оперативен до крајот на годинава, се наведува во прес-соопштението што денеска го објави „Волво“.