„Зголемувањето на јазот во богатството помеѓу мал број најбогати и сите останати граѓани во Македонија е сериозен проблем.
Македонија има најнефер распределба на доходот во Европа. По распределбата на доходот, земјава веќе силно се приближува до латино американските земји. Особено е загрижувачки што 60% од населението заедно (најсиромашните 20%, вторите 20% и третите 20% од населението) имаат понизок доход од најбогатите 10% во земјава“, изјави на денешната прес-конференција Драган Тевдовски, претседател на Комсијата за економија на СДСМ.
„На Македонија и се случува една неприродна мешавина на два спротивни механизми – неолиберална идеологија и популизам. Само со една цел – да го зголеми доходот и богатството на една мала група на луѓе. Тоа е една од причините зошто не се подобрува стандардот на граѓаните, зошто не се намалува невработеноста и сиромаштијата.
Фер распределба на доходот во нашето општество не може да се обезбеди со програми во 100 чекори, надградени и проширени, се додека постојат механизмите кои ја создаваат нееднаквоста. Се додека постојат неолиберазлизмот и популизмот вакви програми ќе бидат само една фина маска во зголемувањето на неправедноста во распределбата на доходот во општеството.
За да се обезбеди иднината на Македонија наместо 100, 1.000 или 1 милион чекори потребно е да се изградат 5 столбови.
Првиот столб е предуслов за сè – тој треба да ја врати демократијата во земјата и да обезбеди владеење на правото.
Вториот столб треба да обезбеди одговорност на јавните трошења преку многу поголема транспарентност, а приоритет во развојот на земјата да им даде на растот на платите, на малите и средните претпријатија (МСП) и на долгорочните вложувања, со што ќе се сруши системот на популизам и политичка патронажа.
Третиот столб треба го демонтира неолиберализмот и да го замени со социјално праведна држава.
Четвртиот столб се однесува на меѓуетничките односи и значи замена на етничката тензија во општеството со нова помеѓу класите.
Петтиот столб треба да ја обезбеди надворешно политичката – безбедност и економска иднина на земјава преку членството во НАТО и ЕУ“, рече Драган Тевдовски, претседател на Комсијата за економија на СДСМ.