Министерот за финансии на Грција Јанис Варувакис изјави дека постојат „100-процентни шанси“ Атина да постигне договор со меѓународните кредитори по референдумот закажан за в недела.
Пред само еден ден тој изјави дека подобро „ќе си ја отсече раката“ отколку што би потпишал договор со кредитори кој не одговара.
– Договорот ќе биде постигнат без оглед дали одговорот на референдумот ќе биде – да или не, изјави тој за Би-Би-Си.
– Ако победи опцијата „да“, тоа ќе биде лош договор, банките ќе бидат отворени со лош договор. Ако победи „не“, ќе имаме поинаков договор кој ќе биде одржив во согласност со предлозите кои ни се упатени во изминатите денови, нагласи Варуфакис.
Тој остро ја критикуваше политиката на штедење применета во Грција во изминатите пет години и продолжувањето на преговорите со кредиторите.
– Имаме многу лош систем на управување. Тоа не е начин на раководење со монетарната унија. Тоа е комедија, грешка веќе пет години, а Европа замижува и продолжува со сето тоа, изјави Варуфакис во интервјуто за Би-Би-Си.