Слободен увоз на суровина преку целата година наместо оптоварувања со царини и прелевмани, бараат компаниите од конзервната индустрија.
Како што беше речено денеска на прес-конференција во Стопанската комора, моментно, иако производството и увозот бележат позитивен тренд, искористеноста на капацитетите за преработка на овошје и зеленчук е само 35 отсто.
– Суровината е проблем подолго време. Царината за увоз на домат и пипер е 45 проценти, а на оваа сума се плаќаат дополнителни 0,12 евра за килограм прелевмани што е неисплатливо за нашите фирми, истакна Васко Ристовски од Комората.
Потенцијални земји за увоз на суровина се источните, Сирија, Египет, Турција, Мароко.
Има најави годинава да се реализира интервентен увоз на суровина, но, тоа, сметаат компаниите, не е решение зашто е еднократко и бирократски трае многу.
Во македонската конзервна индустрија работат преку 40 компании со околу 1.200 вработени. Од нив 22 преработуваат само зеленчук, четири овошје, а 17 имаат комбинирани линии.
Првите седум месеци од годинава се извезени 15.100 тони преработки што е 10,2 отсто повеќе во однос на истиот период лани и е остварен девизен прилив од 24,6 милиони долари со раст од 13,4 проценти.